စက်မှုကြီးကြပ်ရေးဌာန

     ပုဂ္ဂလိက စက်မှုလုပ်ငန်းများအား အောက်ဖေါ်ပြပါ ပုဂ္ဂလိက စက်မှုလုပ်ငန်းဥပဒေ၏ အခြေခံမူများနှင့်အညီ လုပ်ကိုင်နိုင်ရေးအတွက် အကောင်အထည်ဖေါ် ဆောင်ရွက်ရန် ရည်မှန်းချက် ထားရှိပါသည်-      

• တစ်မျိုးသားလုံး၏ ပြည်တွင်းအသားတင်ထုတ်လုပ်မှုနှင့် ဝန်ဆောင်မှုတန်ဖိုးတွင် စက်မှုလက်မှုကဏ္ဍ၏ အသားတင်ထုတ်လုပ်မှု တန်ဖိုးပါဝင်မှု အချိုးအစား မြင့်မား တိုးတက်စေရန်နှင့် စက်မှုလုပ်ငန်းနှင့် ဆက်နွယ်သော စီးပွားရေးလုပ်ငန်း အသီးသီးတွင် ထုတ်လုပ်မှုတိုးတက်စေရန်၊

• စက်မှုလုပ်ငန်းများ၏ စွမ်းဆောင်ရည်မြင့်မားလာစေရေးအတွက် ခေတ်မီနည်းပညာ များရရှိစေရန်နှင့် စက်မှုလုပ်ငန်းမှ ထုတ်လုပ်သော ကုန်ချောပစ္စည်းများကို ပြည်တွင်း စျေးကွက်တွင်သာမက ပြည်ပစျေးကွက်တွင်လည်း အခြေချစေရန်၊

• ပြည်တွင်းသယံဇာတပစ္စည်းကို အဓိကအားထား၍ အသုံးပြုစေရန်၊

• စက်မှုလုပ်ငန်းများဖွံဖြိုးတိုးတက်စေခြင်းဖြင့် ကျေးလက်ဒေသနှင့် မြို့ပြဒေသတို့ ဖွံဖြိုး တိုးတက်မှုကွာဟချက် ကျဉ်းမြောင်းစေရန်၊

• အလုပ်အကိုင်အခွင့်အလမ်းများ တိုးတက်ပေါ်ပေါက်စေရန်၊

• ပတ်ဝန်းကျင်ညစ်ညမ်းစေသောနည်းပညာအသုံးပြုမှုကိုရှောင်ရှားစေရန် သို့မဟုတ် လျော့ချစေရန်၊

• စွမ်းအင်ကို ထိရောက်အကျိုးရှိစွာ အသုံးပြုစေရန်။

• ပုဂ္ဂလိကစက်မှုလုပ်ငန်းများအား ပုဂ္ဂလိကစက်မှုလုပ်ငန်းဥပဒေ၊ လုပ်ထုံးလုပ်နည်းများ နှင့်အညီမှတ်ပုံတင်ခြင်း၊ နှစ်စဉ်သက်တမ်းတိုးမြှင့်ခြင်းနှင့် မှတ်ပုံတင် လုပ်ငန်းအချက်အလက် ပြောင်းလဲမှုများကို စိစစ်ဆောင်ရွက်ခြင်း၊

• မှတ်ပုံတင်ပြီး ပုဂ္ဂလိကစက်မှုလုပ်ငန်းများ၏ ကိန်းဂဏန်းအချက်အလက်များကို စိစစ်ပြုစု ထိန်းသိမ်းခြင်း၊

(က)  ဦးစီးဌာနရုံးချုပ်၊ စက်မှုကြီးကြပ်ရေးဌာန

• တိုင်းဒေသကြီး/ ပြည်နယ်/ ပြည်ထောင်စုနယ်မြေ ဦးစီးဌာနရုံးများမှ ပုဂ္ဂလိကစက်မှု လုပ်ငန်းများနှင့် စပ်လျဉ်း၍ ကနဦး စိစစ်တင်ပြချက်များအား ပုဂ္ဂလိကစက်မှု လုပ်ငန်း ဥပဒေ၊ လုပ်ထုံး လုပ်နည်းများနှင့်အညီ စိစစ်ဆောင်ရွက်ပါသည်၊

•  စိစစ်တွေ့ရှိချက်များအရ အမိန့်၊ ညွှန်ကြားချက်များနှင့်အညီ ဝန်ကြီးဌာနသို့ တင်ပြ ဆောင်ရွက်ပါသည်။

(ခ )  တိုင်းဒေသကြီး/ ပြည်နယ်/ ပြည်ထောင်စုနယ်မြေဦးစီးဌာနရုံးများ၊ စက်မှုကြီးကြပ်ရေး ဌာန

• ဒေသအတွင်းရှိ ပုဂ္ဂလိကစက်မှုလုပ်ငန်းများ၏ ကနဦးတင်ပြချက်များအား လုပ်ငန်း လိုအပ်ချက်များနှင့်အညီ အထောက်အထားများစိစစ်ခြင်းနှင့် ကွင်းဆင်းစိစစ်ခြင်း ဆောင်ရွက်ပါသည်။

• စိစစ်ရရှိချက်များအား ဒေသကြီးကြပ်ရေးအဖွဲ့သို့ တင်ပြ၍ ဒေသကြီးကြပ်ရေး အဖွဲ့အစည်းအဝေး၏ သဘောထားမှတ်ချက်ဖြင့် အငယ်စား ပုဂ္ဂလိကစက်မှု လုပ်ငန်းများနှင့် အလတ်စားပုဂ္ဂလိကစက်မှုလုပ်ငန်းများအား ဦးစီးဌာန(ရုံးချုပ်)၏ အတည်ပြုချက်ဖြင့် မှတ်ပုံတင်ခွင့်ပြုပါသည်။ အကြီးစား ပုဂ္ဂလိကစက်မှု လုပ်ငန်းများအား မှတ်ပုံတင်ခွင့်ရနိုင်ရန် ဦးစီးဌာနရုံးချုပ်သို့ တင်ပြပါသည်

• ပုဂ္ဂလိကစက်မှုလုပ်ငန်းဥပဒေပါ ပြဌာန်းချက်များအရ ပေးအပ်သော လုပ်ငန်း တာဝန်များဆောင်ရွက်ပါသည်။

         တိုင်းဒေသကြီး/ ပြည်နယ်/ ပြည်ထောင်စုနယ်မြေများရှိ ပုဂ္ဂလိကစက်မှုလုပ်ငန်းများအား ပုဂ္ဂလိက စက်မှုလုပ်ငန်းဥပဒေနှင့်အညီ ဆောင်ရွက်နိုင်ရန် ဒေသဆိုင်ရာ တိုင်းဒေသကြီး/ ပြည်နယ်/ ပြည်ထောင်စုနယ်မြေကြီးကြပ်ရေးအဖွဲ့များကို အောက်ပါအတိုင်း ဖွဲ့စည်းထားရှိပါသည်-

• ဤဥပဒေပြဌာန်းသည့်နေ့တွင် လုပ်ကိုင်လျက်ရှိသော ပုဂ္ဂလိက စက်မှုလုပ်ငန်းများကို  စစ်ဆေးခြင်း၊ မှတ်ပုံတင်ပေးရန် ထောက်ခံချက်ပေးခြင်း သို့မဟုတ် ထောက်ခံချက် ပေးရန် ငြင်းပယ်ခြင်း၊ ပြောင်းရွှေ့စေခြင်း၊ ရပ်ဆိုင်းစေခြင်း သို့မဟုတ် ပိတ်သိမ်း စေခြင်းအတွက် သဘောထားမှတ်ချက်ပေးခြင်း၊
• ပုဂ္ဂလိက စက်မှုလုပ်ငန်းအသစ်များ မှတ်ပုံတင်ပေးရန် လျှောက်ထားလာသော ကိစ္စများကို စစ်ဆေးခြင်း၊ မှတ်ပုံတင်ပေးရန် ထောက်ခံချက်ပေးခြင်း သို့မဟုတ် ထောက်ခံချက်ပေးရန် ငြင်းပယ်ခြင်း၊
• ပုဂ္ဂလိက စက်မှုလုပ်ငန်းများ မှတ်ပုံတင်ပေးရန် ထောက်ခံချက်ပေးရာတွင် အောက်ပါ အချက်များကို ထည့်သွင်းစဉ်းစားရမည်-

  • ပုဂ္ဂလိကစက်မှုလုပ်ငန်း၏ ပတ်ဝန်းကျင်တွင် နေထိုင်လျက်ရှိသော ပြည်သူ များ ၏ ကျန်းမာရေးကို ထိခိုက်စေနိုင်မှုမရှိခြင်း၊

  • မီးဘေးအန္တရာယ် ကင်းရှင်းခြင်း၊

  • ပတ်ဝန်းကျင်အား အနှောင့််အယှက်မဖြစ်ခြင်းနှင့် ညစ်ညမ်းမှုမရှိခြင်း၊

  • ပုဂ္ဂလိကစက်မှုလုပ်ငန်းမှ အလုပ်သမားများ၏ ကျန်းမာရေးကို ထိခိုက်စေနိုင်မှု မရှိသည့်အပြင် အန္တရာယ်ကျရောက်နိုင်မှုလည်း မရှိခြင်း၊

  • တည်ဆဲဥပဒေများကိုလည်း လိုက်နာဆောင်ရွက်မှုရှိခြင်း၊

• စက်မှုလုပ်ငန်းများကို အခြေခံမူများနှင့်အညီ လုပ်ငန်းရှင်များက လိုက်နာဆောင်ရွက်မှု ရှိစေရေးအတွက် ကြီးကြပ်ကွပ်ကဲခြင်း၊

• ပုဂ္ဂလိကစက်မှုလုပ်ငန်းတစ်ခုခုသည် တည်ဆဲဥပဒေတစ်ရပ်ရပ်နှင့် ညီညွတ်မှုမရှိ ကြောင်းစစ်ဆေးတွေ့ရှိလျှင် ယင်းလုပ်ငန်း၏လုပ်ငန်းရှင်ကို အရေးယူနိုင်ရန် သက်ဆိုင်ရာအစိုးရဌာနသို့ အကြောင်းကြားခြင်း၊

• ပုဂ္ဂလိကစက်မှုလုပ်ငန်းများအတွက် စက်မှုနယ်မြေများ သတ်မှတ်ခြင်းနှင့်မြေအငှား ချထားခြင်းတို့ကို ပြုလုပ်နိုင်ရန် သဘောထားမှတ်ချက်ပေးခြင်း၊ 

• လုပ်ငန်းရှင်များအား စက်မှုနယ်မြေကို မြေအငှားချထားရာတွင် သတ်မှတ်ချက်များ နှင့်အညီ ဆောင်ရွက်စေခြင်း၊ 

• ဝန်ကြီးဌာနကဖြစ်စေ၊ ပုဂ္ဂလိကစက်မှုလုပ်ငန်း ညှိနှိုင်းရေးအဖွဲ့ကဖြစ်စေ၊ ပေးအပ်သည့်တာဝန်နှင့် လုပ်ပိုင်ခွင့်များကို ဆောင်ရွက်ခြင်း။