ဘွိုင်လာကိုင်တွယ်ထိန်းသိမ်းသူများသင်တန်းအမှတ်စဉ်(၁/၂၀၂၂) သင်တန်းဖွင့်ပွဲအခမ်းအနားကို (၁၆.၅.၂၀၂၂) ရက်နေ့ နံနက်(၀၉:၀၀)နာရီတွင် စက်မှုကြီးကြပ်ရေးနှင့်စစ်ဆေးရေးဦးစီးဌာန၊ ရန်ကုန်တိုင်းဒေသကြီး၊ ဗဟန်းမြို့နယ် ၊ အမှတ်(၁၉၂)၊ ကမ္ဘာ အေးဘုရားလမ်း၊ ဘွိုင်လာစစ်ဆေးရေး၊ ဘွိုင်လာသင်တန်းဌာန ၊ သင်တန်းခန်းမ၌ ကျင်းပပြုလုပ်ခဲ့ပြီး စက်မှုကြီးကြပ်ရေးနှင့် စစ်ဆေးရေးဦးစီးဌာန၊ ဒုတိယညွှန်ကြားရေးမှူးချုပ် ဦးစိုးမိုးကျော်မှ သင်တန်းဖွင့်အမှာစကား ပြောကြားခဲ့ပါသည်။
သင်တန်းဖွင့်ပွဲအခမ်းအနားသို့ ဘွိုင်လာစစ်ဆေးရေးဌာန ညွှန်ကြားရေးမှူး၊ သင်တန်းမှူး၊ အငြိမ်းစား ညွှန်ကြားရေးမှူး(၅)ဦး၊ အငြိမ်းစား ဒုတိယညွှန်ကြားရေးမှူး(၂)ဦး၊ ရန်ကုန်တိုင်းဒေသကြီး စက်မှုကြီးကြပ်ရေးနှင့်စစ်ဆေးရေးဦးစီးဌာနမှ တိုင်းဒေသကြီးဦးစီးဌာနမှူးနှင့် ဒုတိယညွှန်ကြားရေးမှူးများ၊ ဆေးဝါးစက်ရုံ(အင်းစိန်)မှ ကိုယ်စားလှယ်(၁)ဦးနှင့် သင်တန်းသား/ သင်တန်းသူ (၃၇)ဦး၊ စုစုပေါင်း(၅၃)ဦး တက်ရောက်ခဲ့ကြပါသည်။ အဆိုပါ ဘွိုင်လာကိုင်တွယ်ထိန်းသိမ်းသူများသင်တန်းအမှတ်စဉ်(၁/၂၀၂၂)ကို (၁၆.၅.၂၀၂၂)ရက်နေ့မှစ၍ (၂၄.၆.၂၀၂၂) ရက်နေ့အထိ သင်တန်းဖွင့်လှစ်သင်ကြားပေးမည်ဖြစ်ပါသည်။
အဆိုပါသင်တန်းတွင် သင်ကြားပေးမည့် ဘာသာရပ်များမှာ-
(က) ဘွိုင်လာဥပဒေနှင့် ဘွိုင်လာဥပဒေဆိုင်ရာ လုပ်ထုံးလုပ်နည်းများ
( ခ) ဘွိုင်လာအမျိုးအစားနှင့် အသုံးပြုလေ့ရှိသော လုပ်ငန်းများ
( ဂ) ဘွိုင်လာတပ်ဆင်ကိရိယာများ အသုံးပြုပုံနှင့် ထိန်းသိမ်းနည်းများ
(ဃ) ဘွိုင်လာပျက်စီးယိုယွင်းစေသောအကြောင်းရင်းများနှင့်ပြုပြင်ကာကွယ်နည်းများ
( င) ဘွိုင်လာမတော်တဆထိခိုက်မှုဖြစ်လျှင်ဆောင်ရွက်ရမည့်အချက်များ၊ ကာကွယ် နည်းများနှင့် ပေါက်ကွဲမှုများ
( စ) ဘွိုင်လာသံပြားများအကြောင်း
(ဆ) ဘွိုင်လာသုံးရေများအကြောင်း
( ဇ) ဘွိုင်လာအားဖြည့်လောင်စာများအမျိုးမျိုးတို့၏အကျိုးအပြစ်များအကြောင်း
(စျ) လောင်စာဓါတ်ငွေ့ပေါက်ကွဲမှုဖြစ်ပွားရခြင်းနှင့် ကာကွယ်နည်းများ
(ည) အလိုအလျောက်ထိန်းချုပ်ကိရိယာများအကြောင်း
( ဋ) ဘွိုင်လာစစ်ဆေးခံရန်ပြင်ဆင်နည်းများ
စသည့်ဘာသာရပ်များကို တိုင်းဒေသကြီး/ပြည်နယ် ဘွိုင်လာစစ်ဆေးရေးဌာနများ မှ လုပ်သက်ရင့်ဘွိုင်လာစစ်ဆေးရေးမှူးများမှ စာတွေ့နှင့် လက်တွေ့တို့ကို အလှည့်ကျ သင်ကြား ပို့ချပေးသွားမည်ဖြစ်ပါသည်။
